Kif taħdem Google Search

It-teknoloġija ttejjeb ir-riżultati ta' Search

Google titjieb kull ġurnata. Billi l-web jevolvi l-ħin kollu, dejjem qed intejbu u ninnovaw biex nagħmlu lil Search aħjar milli hi. In-nies ifittxu fuq Google biljuni ta' drabi kull ġurnata. U kull ġurnata jinbidlu t-tipi ta' kontenut li jfittxu - 15% tat-tfittxijiet li naraw kull ġurnata jkunu ġodda.

Google ilha diversi snin tinvesti fl-IA u twassal il-benefiċċji tagħha għall-individwi, għan-negozji u għall-komunitajiet. Sew billi tippubblika riċerka tal-ogħla livell, tibni prodotti li jagħtu għajnuna kbira jew tiżviluppa għodod u riżorsi li jgħinu lil ħaddieħor, aħna ħadna impenn li nagħmlu l-IA aċċessibbli għal kulħadd.

Issa ninsabu f'mument fundamentali fil-vjaġġ tal-IA tagħna. Żviluppi rivoluzzjonarji fl-IA ġenerattiva qed ibiddlu b'mod fundamentali kif in-nies jinteraġixxu mat-teknoloġija — u aħna ta' Google konna qed niżviluppaw b'responsabbiltà mudelli kbar tal-lingwa biex inkunu nistgħu nħaddmuhom b'mod sikur fil-prodotti tagħna. Ninsabu fiduċjużi li l-innovazzjonijiet li qed jinkisbu bis-saħħa tal-IA u li aħna ffukati li niżviluppaw u nwasslu b'kuraġġ u b'responsabbiltà huma utli, validi, u għandhom il-potenzjal li jassistu u jtejbu l-ħajjiet tan-nies madwar id-dinja — dan hu dak li jispirana nkomplu naħdmu.

Nagħmlu Search taħdem bl-aħjar mod għalik

Il-funzjonijiet ta' Google huma mfassla biex jagħmluha aktar faċli biex inwasslu lin-nies għall-informazzjoni li jkunu qed ifittxu bl-aktar mod veloċi possibbli, u mhux li nżommu lill-utenti fuq il-pjattaformi tagħna. Meta ma ssibx dak li tkun qed tfittex minnufih, tħoss sens ta' frustrazzjoni li jkollok toqgħod tagħmel tfittxijiet oħra. Allura, tul is-snin, aħna żviluppajna modi ġodda kif norganizzaw u nuru r-riżultati biex ngħinuk issib dak li tkun qed tfittex aktar malajr.

Jekk tfittex kafetterija lokali, nistgħu nuruk il-menù tagħha, kemm tinsab 'il bogħod, jekk tkunx iffullata f'dak il-mument, jew jekk toffrix servizz ta' twassil tal-ordni. Jew jekk tfittex dwar it-temp, nuruk it-tbassir tat-temperatura lokali. Dawn ir-riżultati huma ta' għajnuna għall-utenti, u parti mill-ħidma kontinwa tagħna biex nagħmlu lil Google Search aħjar kuljum.

Fl-aħħar mill-aħħar, irridu li n-nies jużaw il-prodotti u s-servizzi tagħna għax jippreferuhom, mhux għax iħossuhom li jridu jagħmlu dan għax ma jkollhomx għażla oħra. Dan il-prinċipju jinsab fil-qalba ta' Takeout, l-għodda tagħna ta' portabbiltà tad-dejta li tgħin lin-nies jesportaw kopji tad-dejta tagħhom minn aktar minn 70 prodott ta' Google, inklużi Gmail, Drive u Photos. Il-prinċipji li jsawru lil Takeout japplikaw ukoll għad-Data Transfer Project (DTP), sforz meħud mill-industrija kollha kemm hi li aħna waqqafna u komplejna mmexxu flimkien ma' Microsoft, Twitter, Facebook, u Apple.