Google तपाईंलाई आफ्नो वरपरका ठाउँहरू पत्ता लगाउन र रोमाञ्चक अनि सिर्जनात्मक तरिकाले तिनको अन्वेषण गर्न सघाउने कुरामा प्रतिबद्ध छ। हाम्रा प्लेटफर्महरूमा फोटोहरू तपाईंलाई आफू नजिकैका वा विश्वभरिका विभिन्न ठाउँहरूको प्रिभ्यू हेर्न तथा तिनको अन्वेषण गर्न सघाउँदै तपाईंलाई अझ राम्रो अनुभव दिलाउने प्रयोजनका लागि उपलब्ध गराइएका हुन्। हामी यी फोटोहरू उपयोगी होऊन् र यिनले हाम्रा प्रयोगकर्ताहरूलाई उहाँहरूले अन्वेषण गर्ने वास्तविक दुनियाँ जस्ताको तस्तै देखाउन सकून् भन्ने कुरा सुनिश्चित गर्न हरसम्भव प्रयास गर्छौँ।
हाम्रा फोटोहरू प्रयोगकर्ताहरूलाई AI मा आधारित नयाँ तथा कल्पनाशील सुविधाहरू प्रदान गर्ने प्रयोजनका लागि पनि प्रयोग गर्न सकिन्छ। यसले सिर्जना गर्ने र खोज्ने नयाँ-नयाँ तरिकाहरू उपलब्ध गराएर तपाईंलाई नवीन डिजिटल सामग्रीका सहायताले विश्वको अन्वेषण गर्न सघाउन सक्छ। Google गोपनीयतासम्बन्धी आफ्ना प्रतिबद्धताहरू अनुरूप AI मा आधारित यी फोटोहरू जिम्मेवारीपूर्वक प्रयोग गर्ने कुरामा प्रतिबद्ध छ।
बाह्य पक्षहरू वा Google ले सडक दृश्य इमेजरीमा योगदान पुर्याउन सक्छन्। तपाईं हरेक छविसँगै प्रस्तुत गरिने श्रेयको नाम वा आइकनको सहायताले फरक छुट्याउन सक्नुहुन्छ। कुनै बाह्य योगदानकर्ताले कैद गरी Google नक्सामा प्रकाशित गरेको इमेजरी सोही योगदानकर्ता (वा तिनीहरूले तोकेका कुनै उत्तराधिकारी) को स्वामित्वमा रहन्छ।
यो पेजले Google ले योगदान गरेका Street View फोटोसम्बन्धी नीतिहरू निर्धारण गर्दछ। प्रयोगकर्ताले योगदान पुर्याएका Street View फोटोका हकमा कृपया नक्साका प्रयोगकर्ताले योगदान पुर्याएका सामग्रीसम्बन्धी नीति हेर्नुहोस्।
Google ले योगदान गरेको Street View सम्बन्धी नीति फोटोसम्बन्धी नीति
Street View फोटो हेर्ने सबै जनाले सकारात्मक र लाभदायी अनुभव प्राप्त गरून् भन्ने कुरा सुनिश्चित गर्ने कार्यमा मद्दत पुर्याउन हामीले Google ले योगदान गरेको Street View सम्बन्धी यो नीतिको विकास गरेका छौँ। यो नीतिले हामीले अनुपयुक्त सामग्रीको व्यवस्थापन गर्ने तरिकाका साथै हामीले Google नक्सामा Street View फोटो प्रकाशन गर्दा पालना गर्ने मापदण्डहरूका बारेमा व्याख्या गर्दछ। हामीले बेला बेलामा आफ्ना नीति परिवर्तन गर्न सक्ने भएकाले कृपया समय समयमा यो नीतिको जाँच गर्नुहोस्।
Street View क्यामेराले कुनै लोकेसन हुँदै जाँदा जस्तो फोटो खिचेको थियो Street View फोटोमा त्यस्तै फोटो मात्र देखिन्छ। त्यसपछि, तिनीहरूको प्रक्रिया अघि बढाउन महिनौँ लाग्छ। यसको मतलब तपाईंलाई देखाइने सामग्री केही महिनादेखि केही वर्ष पुरानो हुन सक्छ। हामीले वर्षौँदेखि फोटो सङ्कलन गर्दै आएका केही लोकेसनहरूमा तपाईं हाम्रो टाइम मेसिन कार्यमा उक्त फोटोमा भएका परिवर्तनहरू पनि हेर्न सक्नु हुने छ।
Google ले Google नक्सामा र नयाँ AI सुविधाहरू विकास गर्ने क्रममा Street View फोटोहरू प्रयोग गर्दा तिनमा देखिएका मान्छेहरूको गोपनीयता सुरक्षित राख्न विभिन्न कदमहरू चाल्छ।
गोपनीयता स्वतः सुरक्षित राख्ने सुविधाहरू: हामीले अनुहार र सवारी साधनका नम्बर प्लेट ब्लर गर्ने नवीनतम प्रविधि विकसित गरेका छौँ। यो प्रविधि Street View मा भएका Google ले योगदान गरेका फोटोहरूमा देखिएका पहिचान गर्न सकिने अनुहार र सवारी साधनका नम्बर प्लेटहरू ब्लर गर्न सक्ने हिसाबले डिजाइन गरिएको छ।
जेनेरेटिभ AI को प्रयोजनका लागि Street View को प्रयोग: हामी हाम्रा प्रयोगकर्ता तथा साझेदारहरूलाई उपयोगी टुलहरू उपलब्ध गराउने प्रयोजनका लागि Street View फोटोहरू प्रयोग गरी हाम्रा शक्तिशाली जेनेरेटिभ AI मोडेलहरू (जस्तै, Gemini, Nano Banana र Veo) लाई तालिम र प्रम्प्ट दिन्छौँ। यी टुलहरूले हाम्रा प्रयोगकर्ता तथा साझेदारहरूलाई वास्तविक दुनियाँका दृश्यहरूलाई नयाँ तरिकाले प्रस्तुत गर्ने नवीन डिजिटल सामग्री बनाउन मद्दत गर्छन्। गोपनीयतासम्बन्धी हाम्रा कडा मापदण्डहरू पूरा गर्न र AI ले जेनेरेट गरेका फोटोहरूमा व्यक्तिगत रूपमा पहिचान गर्न सकिने र संवेदनशील जानकारी कमभन्दा कम समावेश गर्न (उदाहरणका लागि, ती फोटोहरूबाट शरीरको पूरा भाग र सवारी साधनहरू हटाउन) जेनेरेटिभ प्रम्प्टका लागि प्रयोग गरिने फोटोहरूमा थप स्वचालित फिल्टर प्रयोग गरिन्छ।
थप ब्लर गरिदिन अनुरोध गर्ने तरिका: तपाईंलाई आफ्नो अनुहार वा सवारी साधनका नम्बर प्लेटहरू अझै ब्लर गरिनु पर्छ जस्तो लाग्छ भने वा तपाईं हामीलाई आफ्नो घर, कार वा शरीर ब्लर गर्न लगाउन चाहनुहुन्छ भने "समस्याका बारेमा रिपोर्ट गर्नुहोस्" टुल प्रयोग गरी अनुरोध पेस गर्नुहोस्। हामी Street View मा प्रकाशित फोटोका सबै कपीहरू ब्लर गरेर यी अनुरोधहरू लागू गर्छौँ।
ब्लर गर्ने प्रक्रिया र AI ले जेनेरेट गरेको सामग्री: हामीले ब्लर गरिदिने नयाँ अनुरोध प्राप्त गरी उक्त अनुरोध लागू गर्ने क्रममा हामी तपाईंको गोपनीयता सुरक्षित राख्दै उक्त समयपछि AI ले जेनेरेट गर्ने प्रम्प्टमा ब्लर गरिएको नयाँ Street View फोटो समावेश नगरिने कुरा पनि सुनिश्चित गर्छौँ। तर ब्लर गरिदिने नयाँ अनुरोध प्राप्त भएपछि पनि तेस्रो पक्षहरूले पहिले नै बनाएका वा प्रकाशित गरेका AI ले जेनेरेट गरेका फोटोहरूमा भने कुनै प्रभाव पार्दैन।
तपाईं "समस्याका बारेमा रिपोर्ट गर्नुहोस्" लिंक प्रयोग गरी अनुपयुक्त सामग्रीका बारेमा रिपोर्ट गर्न सक्नुहुन्छ। हामी सामग्रीमा कलात्मक, शैक्षिक वा वृत्तचित्रात्मक महत्त्व समावेश भएको अवस्थामा बाहेक निम्न कोटीका सामग्रीलाई अनुपयुक्त सामग्री मान्छौँ।
हामी प्रतिलिपि अधिकारलगायत अन्य कुनै व्यक्तिको कानुनी अधिकार उल्लङ्घन गर्ने फोटो वा अन्य कुनै सामग्रीलाई अनुमति दिँदैनौँ। थप जानकारी प्राप्त गर्न वा DMCA अनुरोध दर्ता गर्न हाम्रो प्रतिलिपि अधिकारसम्बन्धी कार्यविधि हेर्नुहोस्।
हामी यौनजन्य सामग्रीलाई अनुमति दिँदैनौँ।
हामी अवैध प्रकृतिका, खतरनाक वा गैरकानुनी कार्यलाई बढावा दिने वा ग्राफिक वा अनावश्यक हिंसा समावेश भएका सामग्रीलाई अनुमति दिँदैनौँ।
हामी मान्छेहरूमाथि दुर्व्यवहार गर्ने, दादागिरी देखाउने वा आक्रमण गर्न Street View को प्रयोग गर्ने सामग्रीलाई अनुमति दिँदैनौँ।
हामी वर्ण, जातीय मूल, धर्म, अपाङ्गता, लिङ्ग, उमेर, राष्ट्रियता, भूतपूर्व सैन्य अवस्था, यौन झुकाव वा लैङ्गिक पहिचानका आधारमा व्यक्ति वा समूहविरुद्धको हिंसालाई बढावा दिने वा त्यस कार्यको समर्थन गर्ने सामग्रीलाई अनुमति दिँदैनौँ।
हामी आतङ्कवादी सङ्गठनहरूलाई भर्ती गर्नेलगायत कुनै पनि प्रयोजनका लागि यो सेवा प्रयोग गर्ने अनुमति दिँदैनौँ। हामी आतङ्कवादी क्रियाकलापहरूलाई बढावा दिने, हिंसा भड्काउने वा आतङ्कवादी आक्रमण भएको कुरामा खुसियाली मनाउने जस्ता आतङ्कवादसँग सम्बन्धित सामग्रीहरू हटाउने छौँ।
Google ले बालबालिकाको शोषण वा दुर्व्यवहार गर्ने सामग्रीविरुद्ध शून्य सहनशीलता नीति अपनाउँछ। यसमा यौन दुर्व्यवहार देखिने सम्पूर्ण इमेजरी तथा बालबालिकालाई यौनजन्य रूपमा प्रस्तुत गर्ने सम्पूर्ण सामग्रीहरू पर्दछन्। तपाईंलाई कुनै सामाग्रीले यसरी बालबालिकाको शोषण गर्छ जस्तो लागेमा तपाईंको उद्देश्य उक्त सामग्रीलाई Google को ध्यानाकर्षण गराउनु हो भने पनि कृपया त्यसलाई फेरि सेयर गर्ने वा त्यसमा कमेन्ट गर्ने काम नगर्नुहोस्। तपाईंले इन्टरनेटमा अन्यत्र यस्तो सामग्री फेला पार्नुभएको खण्डमा कृपया सीधै नेसनल सेन्टर फर मिसिङ एन्ड एक्सप्लोइटेड चिल्ड्रेन (NCMEC) मा सम्पर्क गर्नुहोस्।
हामी तपाईं वा अन्य कुनै व्यक्तिको क्रेडिट कार्डसम्बन्धी विवरण, मेडिकल रेकर्ड वा सरकारले जारी गरेको परिचय पत्र जस्ता व्यक्तिगत पहिचान खुलाउने जानकारी समावेश भएका सामग्रीलाई अनुमति दिँदैनौँ।