Google танд хүрээлэн буй ертөнцөө сэтгэл хөдөлгөм, бүтээлч арга замаар судалж нээхэд туслах зорилгыг өвөрлөн ажилладаг. Манай платформ дээр байршуулсан зураглал нь танд ойр орчмынхоо болон дэлхийн өнцөг булан бүрд байрлах газрыг урьдчилан үзэж, судлах боломжийг олгон, манай Газрын зургийн хэрэглээг сайжруулах зорилготой. Энэхүү зураглалд хэрэглэгчдийнхээ судалдаг дэлхий ертөнцийг тусгаж, хэрэгтэй байлгахын тулд бид чадах чинээгээрээ хичээдэг.
Манай зураглал мөн ХОУ-аар дамжуулан төсөөллийн шинэ хэрэглээг дэмждэг. Энэ нь танд шинэлэг дижитал контентоор дамжуулан дэлхий ертөнцийг судлахад тусалж, бүтээлч эрэл хайгуулын шинэ хэлбэрийг дэмжинэ. Google нь нууцлалын үүрэг амлалтынхаа дагуу ХОУ-аар энэ зураглалыг хариуцлагатай ашиглах үүрэг хүлээсэн.
Гудамж харахын зураглалыг гаднын этгээд эсвэл Google өөрөө оруулж болно. Холбогдох нэр эсвэл дүрс тэмдгээр нь тухайн зургийг ялгаж мэдэх боломжтой. Гаднын этгээд авч, Google газрын зурагт нийтэлсэн зураглалыг тухайн этгээд буюу хувь нэмэр оруулагч (эсвэл түүний өв залгамжлагч) эзэмшинэ.
Google-н Гудамж харахын зураглалын бодлогод энэ хуудсан дээр бий. Хэрэглэгчийн хувь нэмэр оруулсан Гудамж харахын зураглалыг Газрын зургийн хэрэглэгчийн хувь нэмэр оруулсан контентын бодлогоос харна уу.
Google-н хувь нэмэр оруулсан Гудамж харахын Зураглалын бодлого
Гудамж харахын зураглалыг үзэж байгаа хэнд ч эерэг нөлөөтэй, ашиг тустай хэрэглээтэй байлгах үүднээс бид Google-н хувь нэмэр оруулсан Гудамж харах үйлчилгээний энэхүү бодлогыг боловсруулав. Зохисгүй контентыг бидний зүгээс хэрхэн хянах, Гудамж харахын зураглалыг Google Газрын зурагт нийтлэхэд ямар шалгууртай болох талаар энд тайлбарласан. Бид бодлогыг цаашид шинэчилж болох тул үе үе эргэн шалгаж байгаарай.
Гудамж харахын зураглал зөвхөн тухайн өдөр манай камерт өртсөн байршлын байдлыг харуулдаг. Зургийг аваад боловсруулж дуусах хүртэл хэдэн сар болдог. Тиймээс тухайн контент нь хэдэн сараас хэдэн жилийн өмнөх байдлыг харуулсан байж болно. Бидний олон жилийн турш зураглалыг нь цуглуулсан зарим байршилд та манай Цаг хугацааны машин функцийг ашиглан тухайн зураглалд орсон өөрчлөлтийг мөн харах боломжтой.
Google нь ХОУ-ы шинэ чадамжуудыг хөгжүүлэхэд Гудамж харахын зураглалыг ашиглах үед болон Google Газрын зураг дотор Гудамж харахын зураглал дахь хувь хүний нууцлалыг хамгаалах олон арга хэмжээ авдаг.
Нууцлалын автомат хамгаалалт: Бид Google-н Гудамж харахад оруулсан зураглал дээрх, танигдаж болох нүүр царай, тээврийн хэрэгслийн улсын дугаарыг бүдгэрүүлэх хамгийн сүүлийн үеийн, дэвшилтэт технологийг хөгжүүлээд байна.
Үүсгэгч ХОУ-д Гудамж харахыг ашиглах нь: Бид хэрэглэгч, түншүүддээ бодит ертөнцийн үзэгдлийг дахин төсөөлсөн шинэлэг дижитал контент үүсгэхэд нь туслах үнэ цэнтэй хэрэгслийг нийлүүлэхийн тулд үүсгэгч ХОУ-ы хүчирхэг загваруудаа (Gemini, Nano Banana, Veo зэрэг) сургаж, зааварлахад Гудамж харахын зураглалыг ашигладаг. Үүсгэгч зааварт ашигласан зураглал нь манай нууцлалын хатуу стандартын дагуу, ХОУ-аар үүсгэсэн зураглалд орж болзошгүй хувь хүнийг таних боломжтой бөгөөд эмзэг мэдээллийг багасгахын тулд нэмэлт автомат шүүлтүүрээр дамждаг.
Нэмэлт бүдгэрүүлэлт хүсэх: Хэрэв та өөрийн царай, тээврийн хэрэгслийн улсын дугаарт нэмэлт бүдгэрүүлэлт шаардлагатай байгааг олж харвал эсвэл өөрийн орон сууц, автомашин, биеийг бүхэлд нь бүдгэрүүлэхийг хүсвэл "Асуудлыг мэдээлэх" хэрэгслийг ашиглан хүсэлт илгээнэ үү. Бид нийтлэгдсэн Гудамж харахын зургийн бүх хувьд бүдгэрүүлэлтийг хэрэглэж эдгээр хүсэлтийг ёсоор болгодог.
Бүдгэрүүлэлт ба ХОУ-аар үүсгэсэн контент: Бид бүдгэрүүлэх шинэ хүсэлт хүлээн авч, хэрэгжүүлэхдээ мөн таны нууцлалын сонголтыг хүндэтгэн шинээр бүдгэрүүлсэн Гудамж харахын зургийг тухайн мөчөөс хойш үүсгэгч ХОУ-ы зааварт оруулахгүй байхад анхаардаг. Гэсэн хэдий ч шинэ бүдгэрүүлэх хүсэлт нь гуравдагч талуудын аль хэдийн үүсгэж, нийтэлсэн ХОУ-аар үүсгэсэн аливаа зураглалд нөлөөлөхгүй.
Та "Асуудлыг мэдээлэх" холбоосыг ашиглан зохисгүй контентыг мэдээлж болно. Тухай контент уран сайхны, танин мэдэхүйн эсвэл баримтат үнэ цэнг агуулаагүй бол бид дараах ангиллыг зохисгүй контент гэж үзнэ.
Бусдын хууль ёсны эрх, тэр дотроо зохиогчийн эрхийг зөрчсөн зураг болон бусад контентыг бид хүлээн зөвшөөрөхгүй. Дэлгэрэнгүй мэдээлэл авах эсвэл Дижитал мянганы зохиогчийн эрхийн тухай хууль (DMCA)-ийн дагуу хүсэлт гаргахдаа манай зохиогчийн эрхийн талаар баримтлах журмыг харна уу.
Насанд хүрэгчдийн бэлгийн контентыг бид хүлээн зөвшөөрөхгүй.
Хууль бус шинжтэй, аюултай хийгээд гэмт үйлдлийг өөгшүүлэн дэмжсэн, хүчирхийллийг тодорхой шалтгаангүйгээр агуулсан контентыг бид хүлээн зөвшөөрөхгүй.
Бусдыг дарамталж дээрэлхэх, дайрч давшлах зорилгодоо Гудамж харахыг ашигласан контентыг бид хүлээн зөвшөөрөхгүй.
Арьс өнгө, үндэс угсаа, шашин шүтлэг, хөдөлгөөний бэрхшээл, нас, хүйс, иргэний харьяалал, ахмад дайчин, бэлгийн чиг баримжаа буюу хүйсийн баримжааны илэрхийлэл зэрэгт үндэслэн тухайн хувь хүн болон нийгмийн тодорхой нэг бүлгийн эсрэг хүчирхийллийг өөгшүүлэн, зөвтгөсөн контентыг бид хүлээн зөвшөөрөхгүй.
Террорист байгууллагууд тус үйлчилгээг ямар нэгэн зорилгоор ашиглах, тэр дотроо хүн элсүүлэх зорилгоор ашиглахыг бид хүлээн зөвшөөрөхгүй. Мөн террорист үйлдлийг дэмжсэн, хүчирхийлэлд турхирсан, эсвэл террорист халдлагыг дэмжсэн гэх зэрэг терроризмтой холбоотой контентыг бид устгах болно.
Google нь хүүхдийг мөлжсөн эсвэл хүчирхийлсэн контентыг үл тэвчих бодлого баримталдаг. Үүнд бэлгийн хүчирхийллийг харуулсан бүхий л зураглал, хүүхдийг бэлгийн харьцаанд уруу татаж оролцуулсан бүх төрлийн контент хамаарна. Хэрвээ хүүхдийг дээрх байдлаар мөлжин ашигласан байж болзошгүй контенттой таарвал Google-н анхаарлыг хандуулах зорилготой байсан ч бусадтай хуваалцаж, сэтгэгдэл бичихгүй байхыг хүсье. Хэрвээ та интернэтэд хаа нэгтээ иймэрхүү контенттой таарвал Сураггүй алга болсон, мөлжлөгт өртсөн хүүхдийн асуудал эрхэлсэн үндэсний төв (NCMEC)-д шууд хандаарай.
Таны эсвэл өөр хүний зээлийн картын дэлгэрэнгүй мэдээлэл, өвчний түүх, төрөөс олгосон биеийн байцаалт зэрэг хувь хүнийг таних мэдээллийг агуулсан контентыг бид хүлээн зөвшөөрөхгүй.