Google tinvesti f'sistemi maħsuba biex niżguraw li s-siti ma jkunux jistgħu iqarrqu jew jieħdu vantaġġ mhux mistħoqq mis-sistema tagħna biex jintwerew f'post aħjar fir-riżultati ta' Tiftix. Dan huwa importanti ħafna għax is-siti ta' spam jistgħu jqarrqu bin-nies u jagħmlulhom il-ħsara.
Nagħrfu l-ispam biex nagħtuk riżultati siewja u li tista' tafda
Sir af kif Google tħarsek int u tuża Tiftix
Ara l-vidjo
1:50
Għaliex naħdmu biex inwaqqfu l-ispam
Is-siti bl-ispam jippruvaw jimmanipulaw l-algoritmi tagħna biex jintwerew minn tal-ewwel fir-riżultati ta' Tiftix. Biex jagħmlu hekk jużaw firxa wiesgħa ta' tekniki bħal li jirrepetu l-istess kliem ewlieni ħafna drabi fl-istess paġna jew juru lil Google kontenut differenti minn dak li juru lill-utenti (teknika magħrufa bħala "cloacking"). Il-hackers kultant jirnexxielhom jidħlu f'siti ġenwini u jibdluhom f'siti mimlija kontenut mhux mixtieq li jonsbu lin-nies fi skemi qarrieqa jew ħwejjeġ agħar.
Fl-2020 biss, is-sistemi tagħna kienu qed isibu 40 biljun paġna b'kontenut mhux mixtieq kuljum.
Kif naqbdu l-ispam
Għandna linji gwida ċari li jagħrfu l-imiġiba tas-siti bil-kontenut bl-ispam u noffru proċess ċar biex wieħed jappella kontra t-tneħħija tas-siti mill-indiċi tagħna wara li l-kontenut bl-ispam ikun tneħħa.
Is-sistemi awtomatiċi tagħna jistgħu jaqbdu l-biċċa l-kbira tal-ispam u ma jħallux lil dawn is-siti jintwerew fir-riżultati ta' Tiftix, l-istess kif sistema tal-email tajba twaqqaf l-ispam milli jimlielek l-inbox tiegħek.
Il-bqija tas-siti bl-ispam jitneħħew waħda waħda mit-tim għat-tneħħija tal-ispam tagħna. Il-membri ta' dan it-tim jiċċekkjaw il-paġni u jekk isibu li jkunu qed jiksru l-Linji Gwida għal Sidien is-Siti, jirrappurtawhom. Meta membru tat-tim tagħna jirrapporta xi kontenut, min-naħa tagħna nippruvaw navżaw lill-ħallieq tal-kontenut biex ngħinuh isewwi l-problema.
Malli l-problema tissewwa, sid is-sit jista' jressaq appell. Aħna nqisu kull appell li jidħlilna.
L-għan tagħna huwa li kull sid ta' sit tal-internet ikollu l-informazzjoni kollha meħtieġa biex jirranġa s-sit tal-internet tiegħu. Biex nilħqu dan l-għan, matul is-snin investejna għadd kbir ta' riżorsi biex inwasslu l-messaġġ tagħna lis-sidien tas-siti u biex nikkomunikaw magħhom. Fl-2018 bgħatna iktar minn 180 miljun messaġġ lis-sidien tas-siti biex ngħarrfuhom li s-siti tagħhom kienu qed ixerrdu l-ispam.
Il-ġlieda kontra l-ispam biex inżommu r-riżultati li nagħtuk siguri u siewja hija sfida li nħabbtu wiċċna magħha kuljum.
Għalkemm nixtiequ nagħtu iktar informazzjoni dwar kif jaħdem Tiftix, jeħtieġ li noqogħdu attenti wkoll biex ma nagħtux wisq dettalji — wisq dettalji jistgħu jwasslu biex inkun hemm min jimmanipula r-riżultati tat-tiftix u hekk kulħadd jispiċċa tellief.
Din kienet esperjenza li fl-imgħoddi għaddejna minnha. Fl-1999, il-fundaturi ta' Google ħarġu dokument importanti dwar PageRank, sistema innovattiva li kienet kruċjali għall-algoritmu ta' Google. Wara li ħareġ dak id-dokument, l-ispammers ippruvaw jimmanipulaw is-sistema ta' Google u bdew iħallsu lil xulxin għall-ħoloq.
Tiftix huwa għodda b'saħħitha. Huwa teknoloġija li jgħin lin-nies isibu, jaqsmu u jiksbu għadd kbir ta' kontenut, ikunu fejn ikunu u jaqbdu kif jaqbdu mal-pjattaforma tagħna. Aħna naħdmu qatigħ biex niżguraw li meta tuża Tiftix, nagħtuk riżultati ta' kwalità u mhux spam. Il-ħidma tagħna biex dejjem intejbu t-teknoloġija tagħna għal kontra l-ispam tkompli bla waqfien u se nkomplu naħdmu fil-qrib mas-sidien tas-siti u nies oħra biex inrawmu u nkomplu nibnu ekosistema ta' siti ta' kwalità.
Sir af iktar
Norganizzaw l-informazzjoni
Sir af kif Google dejjem qed taħdem biex ikollha l-ikbar indiċi fid-dinja.
Insarbtu r-riżultati
Sir af kif nagħżlu liema riżultati tat-tiftix għandhom jintwerew qabel oħrajn.
Nippruvaw Kollox bir-Reqqa
Sir af iktar dwar il-proċessi u l-għodod li tuża Google biex tagħraf l-informazzjoni siewja, rilevanti.