Do illamento á visibilidade: como Street View abriu un reino budista ao mundo.

Mapeamento dixital da beleza de Bután

Antes da iniciativa de Street View, Bután non tiña os equipamentos nin os coñecementos técnicos para chegar aos visitantes potenciais, o que dificultaba aos turistas planificar as viaxes. Agora, calquera persoa, desde un peregrino budista a un potencial visitante, pode descubrir virtualmente os mosteiros-fortaleza de Timbu e as aldeas inmaculadas de Punakha.

Este proxecto non é só unha das pedras angulares do plan do Goberno por chegar a todo o mundo, senón que tamén supón avanzar cara á dixitalización da sociedade de Bután.

Unha vía butanesa máis percorrida

A navegación intelixente de Street View permitiu aos turistas acceder a un dos lugares máis interesantes do mundo e deu aos viaxeiros liberdade de elección e de movemento. O acceso a gravacións en 360° e a percorridos virtuais en tempo real das condicións sobre o terreo axudou aos visitantes a facerse unha idea da viaxe e a explorar as súas posibilidades.

Con 500 empresas novas engadidas a Street View e 4000 actualizacións dos mapas de Bután, os habitantes do país tamén poden gozar das vantaxes, que van desde información actualizada do tráfico e suxestións de rutas en tempo real ata máis visibilidade para os negocios locais.

Mellores imaxes en Street View

A iniciativa de Street View do Goberno, ademais de abrir o país ao mundo, foi moi útil á hora de planificar proxectos de desenvolvemento. O feito de gravar lugares que estiveron agochados durante séculos marca o inicio da estratexia de mantemento do patrimonio histórico de Bután. A través dos datos de Street View, pódense rexistrar as condicións das estradas e melloralas, se é necesario.

Bután cada vez acolle máis visitantes. Polo momento só se cartografaron vinte cidades, hai un territorio de 38 394 km² por descubrir e está previsto ir actualizando regularmente os mapas coas novas infraestruturas que se desenvolvan, así que esta iniciativa de Street View só acaba de comezar.

Street View conecta mundos pequenos de grandes maneiras. Dando a coñecer preciosidades agochadas a través de imaxes envolventes, Street View pode revolucionar a traxectoria dun país e ter un papel fundamental no seu desenvolvemento.