Kif Google żżomm id-dejta li niġbru

Aħna niġbru d-dejta waqt li int tuża s-servizzi ta' Google. Dak li niġbru, għaliex niġbruh, u kif int tista' timmaniġġja l-informazzjoni tiegħek huma deskritti fil-Politika tal-Privatezza tagħna. Din il-politika ta' żamma tiddeskrivi għaliex aħna nżommu tipi differenti ta' dejta għal perjodi ta' żmien differenti.

Ċerta dejta tista' tħassarha meta trid, ċerta dejta titħassar b'mod awtomatiku, u ċerta dejta nżommuha għal perjodi ta' żmien itwal meta jkun neċessarju. Meta int tħassar id-dejta, aħna nsegwu politika dwar it-tħassir biex niżguraw li d-dejta tiegħek titneħħa b'mod sikur u sħiħ mis-servers tagħna jew tinżamm biss f'forma anonimizzata. Kif Google tanonimizza d-dejta

Informazzjoni miżmuma sakemm tneħħiha

Noffru firxa ta' servizzi li jippermettulek tikkoreġi jew tħassar id-dejta maħżuna fil-Kont ta' Google tiegħek. Pereżempju, tista':

• Editja l-informazzjoni personali tiegħek
• Ħassar affarijiet mill-Attività Tiegħi
• Ħassar kontenut bħal ritratti u dokumenti
• Neħħi prodott mill-Kont ta' Google tiegħek
• Ħassar il-Kont ta' Google tiegħek kompletament

Se nżommu din id-dejta fil-Kont ta' Google tiegħek sakemm tagħżel li tneħħiha. U jekk tuża s-servizzi tagħna mingħajr ma tilloggja f'Kont ta' Google, noffrulek ukoll il-possibbiltà li tħassar xi informazzjoni marbuta ma' dak li tuża biex taċċessa s-servizzi tagħna, bħal apparat, brawżer jew app.

Dejta li tiskadi wara perjodu ta' żmien speċifiku

F'xi każijiet, minflok ma nipprovdu mod kif titħassar id-dejta, aħna naħżnuha għal perjodu predeterminat ta' żmien. Għal kull tip ta' dejta, aħna nżommu perjodi ta' żamma bbażati fuq ir-raġuni għall-ġbir tagħha. Pereżempju, biex niżguraw li s-servizzi tagħna jintwerew kif xieraq fuq ħafna tipi differenti ta' apparati, jista' jkun li nżommu l-wisgħa u l-għoli tal-brawżer sa massimu ta' 9 xhur. Aħna nieħdu wkoll passi biex nanonimizzaw jew nippsewdonomizzaw ċerta dejta fi ħdan il-perjodi ta' żmien stabbiliti. Pereżempju, aħna nanonimizzaw dejta tar-reklamar fil-logs tas-servers billi nneħħu parti mill-indirizz IP wara 9 xhur u informazzjoni tal-cookies wara 18-il xahar. Nistgħu nżommu wkoll dejta psewdonimizzata, bħal queries li ġew skollegati mill-Kontijiet ta' Google tal-utenti, għal perjodu ta' żmien stabbilit.

Informazzjoni miżmuma sakemm jitħassar il-Kont ta' Google tiegħek

Aħna nżommu xi dejta sakemm idum attiv il-Kont ta' Google jekk tkun siewja biex tgħinna nifhmu kif l-utenti jinteraġixxu mal-karatteristiċi tagħna u kif nistgħu ntejbu s-servizzi tagħna. Pereżempju, jekk tħassar indirizz li tkun fittixt f'Google Maps, il-kont tiegħek xorta jista' jaħżen il-fatt li użajt il-karatteristika tad-direzzjonijiet. B'dak il-mod, Google Maps jista' jevita li jurik kif tuża l-karatteristika tad-direzzjonijiet fil-futur.

Informazzjoni miżmuma għal perjodi ta' żmien estiżi għal skopijiet limitati

Xi drabi r-rekwiżiti tan-negozju u legali jobbligawna li nżommu ċerta informazzjoni, għal skopijiet speċifiċi, għal perjodu estiż ta' żmien. Pereżempju, meta Google tipproċessa ħlas għalik, jew meta tagħmel ħlas lil Google, inżommu din id-dejta għal perjodi itwal ta' żmien kif meħtieġ għal skopijiet ta' taxxa jew kontabilistiċi. Ir-raġunijiet għalfejn għandna mnejn nżommu xi dejta għal perjodi itwal ta' żmien jinkludu:

• Sigurtà, prevenzjoni ta' frodi u ta' abbuż
• Żamma ta' rekords finanzjarji
• Konformità ma' rekwiżiti legali jew regolatorji
• Kif niżguraw il-kontinwità tas-servizzi tagħna
• Komunikazzjonijiet diretti ma' Google

Kif nippermettu tħassir sikur u sħiħ

Meta tħassar dejta fil-kont ta' Google tiegħek, aħna minnufih nibdew il-proċess li nneħħuha mill-prodott u mis-sistemi tagħna. L-ewwel, naraw li ma tibqax tidher u li d-dejta ma tibqax tintuża għall-personalizzazzjoni tal-esperjenza tiegħek b'Google. Pereżempju, jekk tħassar vidjow li rajt mid-dashboard tal-Attività Tiegħi tiegħek, YouTube minnufih jieqaf juri l-progress sa fejn rajt dak il-vidjow.

Aħna mbagħad nibdew proċess imfassal biex iħassar b'mod sikur u sħiħ id-dejta mis-sistemi tal-ħżin tagħna. It-tħassir sikur hu importanti biex nipproteġu lill-utenti u lill-klijenti tagħna minn telf aċċidentali ta' dejta. It-tħassir sħiħ ta' dejta mis-servers tagħna huwa daqstant ieħor importanti għal serħan il-moħħ tal-utenti. Dan il-proċess ġeneralment jieħu madwar xahrejn miż-żmien tat-tħassir. Spiss dan jinkludi perjodu ta' rkupru li jieħu sa xahar f'każ li d-dejta tkun tneħħiet mingħajr intenzjoni.

Kull sistema ta' ħżin ta' Google li minnha titħassar id-dejta għandha l-proċess dettaljat tagħha stess għat-tħassir sikur u sħiħ. Dan għandu mnejn jinvolvi passaġġi ripetuti mis-sistema biex jiġi kkonfermat li d-dejta kollha tħassret, jew dewmien qasir biex jippermetti l-irkupru mill-iżbalji. Bħala riżultat, it-tħassir jista' xi kultant jieħu aktar żmien meta jkun meħtieġ ħin żejjed biex titħassar b'mod sikur u sħiħ id-dejta.

Is-servizzi tagħna jużaw ukoll ħżin ta' riżerva kriptat bħala saff ieħor ta' protezzjoni biex jgħin fl-irkupru minn diżastri potenzjali. Id-dejta tista' tibqa' fuq dawn is-sistemi sa 6 xhur.

Bħal kull proċess ta' tħassir, affarijiet bħall-manutenzjoni ta' rutina, qtugħ mhux mistenni, bugs jew ħsarat fil-protokolli tagħna jistgħu jikkawżaw dewmien fil-proċessi u l-iskadenzi definiti f'dan l-artiklu. Inmantnu sistemi ddisinjati biex jiskopru u jirrimedjaw problemi bħal dawn.